Американскиот режисер ќе „диригира“ со жирито на овогодинешниот Филмски фестивал во Кан кој ќе биде одржан од 15 до 26 мај.

Претседателот на Канскиот фестивал, Жил Жакоб, вели дека со години се обидувал да го убеди Стивен Спилберг да ја прифати таа задача, но Оскаровецот постојано „се извлекувал“ поради обврски околу снимањето на некој од своите филмови.

„Кога оваа година слушнав дека E.T. се јавил, бев воодушевен и викнав ‘конечно!’“, соопшти Жил.

Спилберг неколку пати гостуваше во Кан со филмови вон конкуренција за награда, а единствено награда за најдобро сценарио доби во далечната 1974 година за остварувањето The Sugarland Express, а прв пат во Кан гостуваше пред 31 година со филмот E.T.

„Чест ми е да претседавам со жири на фестивалот кој секој пат одново докажува дека филмот е јазик на светот“, вели Спилберг.

Претседателот на жирито на минатогодишниот фестивал во Кан беше италијанскиот режисер Нани Морети.