Полицијата во американската сојузна држава Џорџија рано утринава убила човек кој како заложници повеќе часови држел четири пожарникари во својата куќа во предградието на Атланта.

Вооружениот киднапер, кој не е именуван, барал во неговото домаќинство повторно да бидат вклучени електричната енергија и кабловската телевизија, а официјалните податоци покажуваат дека куќата е во процес на запленување.

Петмина пожарникари синоќа интервенирале во наизглед рутински повик за помош, но по доаѓањето на местото на интервенцијата се земени како заложници. Еден пожарникар потоа е ослободен за да го помести пожарникарскиот камион.

Полицијата по повеќечасовните преговори со помала експлозија му го свртела вниманието на киднаперот, а потоа влегла во куќата, при што пожарникарите во пукањето и експлозијата се здобиле со полесни повреди.