ЕВРО 2020 | Марко Арнаутовиќ, кој вечерва ќе ја носи капитенската лента на Австрија, ги предупредува своите соиграчи добро да внимаваат на Горан Пандев, вели дека напаѓачот е клучен играч на Македонија и секогаш има ас во ракавот.
Фудбалерот на Вест Хем играше шест месеци крај Горан Пандев во Интер, двајцата беа дел од историската сезона и тројната титула на „нероаѕурите“.
„Се познаваме добро, задоволство ми е што повторно ќе го видам. Има одлична кариера зад себе и е клучен играч на Македонија. Мораме добро да внимаваме на него, секогаш има ас во ракавот“ – вели Марко Арнаутовиќ.
Австрија ги отвори квалификациите за Европското првенство со два порази, од Полска и Израел, но во петокот се радуваше на три бода и победа против Словенија.
„Очекувам да одиграме со иста мотивација и ентузијазам како против Словенија. Знаеме да играме убав фудбал, и се надeвам дека тоа ќе го покажеме и сега. Сепак, најважно од сè ми е да ја победиме Македонија“.
Извор: 24FUDBAL.com.mk
